நூலிழையில் உயிர் தப்பிய மொஜ்தபா காமேனி: ஏவுகணைத் தாக்குதலின் பகீர் பின்னணி - கசிந்தது ரகசிய ஆடியோ!

துண்டு துண்டாகச் சிதறிய ராணுவத் தளபதி.. கண்முன்னே பலியான மனைவி: ஈரானின் அடுத்த 'சுப்ரீம் லீடர்' மீதான கொலைவெறித் தாக்குதல் அம்பலம்!

தெஹ்ரான்: ஈரானின் உச்சத் தலைவராக இருந்த அயதுல்லா அலி காமேனி கொல்லப்பட்ட அந்தப் பயங்கரமான ஏவுகணைத் தாக்குதலில், அவரது மகன் மொஜ்தபா காமேனி மரணத்தின் விளிம்பு வரை சென்று மீண்டு வந்திருக்கும் திடுக்கிடும் தகவல்கள் தற்போது வெளியாகியுள்ளன. அமெரிக்கா மற்றும் இஸ்ரேல் படைகள் இணைந்து நடத்திய அந்த 'சர்ஜிக்கல் ஸ்டிரைக்' தாக்குதலில் இருந்து அவர் தப்பியது ஒரு 'மிராக்கிள்' என்றே சொல்லப்படுகிறது. ஈரானின் அடுத்த உச்சத் தலைவராகப் பதவியேற்கக் கூடும் எனக் கருதப்படும் மொஜ்தபா காமேனி, ஏவுகணைகள் விழுவதற்குச் சில விநாடிகளுக்கு முன்புதான் அந்த இடத்தை விட்டு வெளியேறினார் என்ற ரகசியத் தகவலை, காமேனியின் அலுவலக நெறிமுறைப் பிரிவுத் தலைவர் மசாஹர் ஹுசைனி ஒரு ரகசியக் கூட்டத்தில் பகிர்ந்துள்ளார். இதன் ஆடியோ தற்போது 'லீக்' ஆகி சர்வதேச ஊடகங்களில் 'ஹாட் டாப்பிக்காக' மாறியுள்ளது.

கடந்த பிப்ரவரி 28-ம் தேதி, ஈரானின் அதிகார மையத்தை மொத்தமாகத் தகர்க்கும் நோக்கில் இஸ்ரேல் அடுத்தடுத்து மூன்று ஏவுகணைகளை ஏவியது. அதில் முதல் ஏவுகணை, உச்சத் தலைவர் அலி காமேனி இருந்த வளாகத்தைத் துல்லியமாகக் குறிவைத்துத் தாக்கியது. "தாக்குதலுக்குச் சற்று முன்பு வரை மொஜ்தபா தனது தந்தையுடன் தான் இருந்தார். ஏதோ ஒரு வேலையாக அவர் அங்கிருந்து வெளியேறி மேல் தளத்திற்குச் சென்ற சில கணங்களிலேயே ஏவுகணை விழுந்து வெடித்தது. கடவுளின் சித்தம் காரணமாகவே அவர் உயிர் தப்பினார்," என மசாஹர் ஹுசைனி அந்த ஆடியோவில் நெகிழ்ச்சியுடன் குறிப்பிட்டுள்ளார். இந்தத் தகவலை 'தி டெலிகிராப்' பத்திரிகை விரிவாக வெளியிட்டுள்ளது.

இந்தத் தாக்குதலின் கொடூரம் எத்தகையது என்பதை விளக்கும் மசாஹர் ஹுசைனி, ஈரான் ராணுவத் தளபதி முகமது ஷிராசியின் மரணம் குறித்துக் குறிப்பிடுகையில் உடல் பதறச் செய்கிறார். "ஏவுகணைத் தாக்குதலில் தளபதி முகமது ஷிராசியின் உடல் சுக்குநூறாகச் சிதறிவிட்டது. அவரது உடலின் எந்தப் பகுதியையும் எங்களால் கண்டறிய முடியவில்லை. இறுதியில் சில கிலோ கிராம் எடையுள்ள உடல் பாகங்களை மட்டுமே சேகரித்து, அதுதான் அவரது உடல் என அடையாளம் கண்டோம்," எனக் கூறியுள்ளார். ஒரு நாட்டின் உயர்மட்ட ராணுவத் தளபதிக்கே இந்த நிலை என்றால், அந்தத் தாக்குதலின் 'இம்பாக்ட்' எவ்வளவு வீரியமாக இருந்திருக்கும் என்பது உலக நாடுகளை அதிரச் செய்துள்ளது.

தாக்குதலில் இருந்து மொஜ்தபா காமேனி நூலிழையில் உயிர் தப்பினாலும், அவர் ஒரு மிகப்பெரிய தனிப்பட்ட இழப்பைச் சந்தித்துள்ளார். "இரண்டாவது ஏவுகணை மொஜ்தபாவின் குடியிருப்பையும், மூன்றாவது ஏவுகணை அவரது மைத்துனர் மிஸ்பா அல்-ஹுதா பாகேரி கானியின் வீட்டையும் தரைமட்டமாக்கின. இதில் மொஜ்தபாவின் காலில் லேசான காயம் மட்டுமே ஏற்பட்டது. ஆனால், துரதிர்ஷ்டவசமாக அவரது மனைவி சம்பவ இடத்திலேயே உடல் சிதறிப் பலியானார்," என்ற தகவல் வெளியாகி ஈரான் முழுவதும் சோக அலையை ஏற்படுத்தியுள்ளது. ஒரே நேரத்தில் தந்தை, மனைவி மற்றும் மிக நெருங்கிய சகாக்களை இழந்த மொஜ்தபா காமேனி, தற்போது ஈரானின் அதிகாரத்தைக் கைப்பற்றும் நெருக்கடியில் உள்ளார்.

மார்ச் 12-ம் தேதி ஈரானின் மூத்த மதகுருமார்கள் மற்றும் இஸ்லாமிய புரட்சிகரப் பாதுகாப்புப் படைத் தளபதிகள் பங்கேற்ற அந்த ரகசியக் கூட்டத்தின் ஆடியோ கசிந்திருப்பது, ஈரான் உளவுத் துறையின் தோல்வியைக் காட்டுவதாகப் பாதுகாப்பு நிபுணர்கள் கருதுகின்றனர். "ஈரானின் மணி மகுடமாகத் திகழ்ந்த தலைவர்கள் கொத்து கொத்தாகப் பலியான இந்தத் தாக்குதல், மத்திய கிழக்கு அரசியலில் ஒரு மிகப்பெரிய 'வேக்யூம்' அல்லது வெற்றிடத்தை உருவாக்கியுள்ளது. மொஜ்தபா காமேனி உயிர் தப்பியது தற்செயலானது என்றாலும், அவர் இனி அமெரிக்க-இஸ்ரேல் கூட்டணியின் முதன்மையான 'டார்கெட்' ஆக இருப்பார் என்பது உறுதி," என்கிறார்கள் சர்வதேச அரசியல் நோக்கர்கள். ஈரானின் அடுத்த நகர்வு என்னவாக இருக்கும் என்ற எதிர்பார்ப்பு இப்போது உலக நாடுகளிடையே எகிறியுள்ளது.