தங்கத்தைத் திருப்பித் தந்த ‘அசல்’ தங்கம் ; குப்பையில் கிடந்த 3.5 சவரன் நகையை ஒப்படைத்த தூய்மைப் பணியாளர் - கோவையில் குவியும் பாராட்டு !!!

 தங்கத்தைத் திருப்பித் தந்த ‘அசல்’ தங்கம் ; குப்பையில் கிடந்த 3.5 சவரன் நகையை ஒப்படைத்த தூய்மைப் பணியாளர் - கோவையில் குவியும் பாராட்டு !!!

​‘அடுத்தவர் பொருளுக்கு ஆசைப்படக் கூடாது’: நேர்மைக்கு இலக்கணமாகத் திகழ்ந்த சக்திவேலுக்குப் பொன்னாடை போர்த்தி கௌரவிப்பு !!!

​கோவையில் குப்பையைத் தரம் பிரிக்கும் போது அதில் தவறுதலாகக் கிடந்த மூன்றரை சவரன் தங்கச் சங்கிலியை, பேராசைப்படாமல் நேர்மையுடன் அதன் உரிமையாளரான மூதாட்டியிடமே பத்திரமாக ஒப்படைத்த ஒப்பந்த தூய்மைப் பணியாளர் சக்திவேலின் உன்னதச் செயல், கொங்கு மண்டல மக்களை நெகிழ்ச்சியில் ஆழ்த்தி உள்ளதுடன், அவருக்குப் பாராட்டுகளையும் விருதுகளையும் குவித்து வருகிறது. 

கோவை சித்தாபுதூர் பகுதியைச் சேர்ந்தவர் சக்திவேல் (47). இவர் ‘ஸ்ரீனிவாசா வேஸ்ட் மேனேஜ்மென்ட் சர்வீஸ்’ என்ற தனியார் நிறுவனத்தில் ஒப்பந்த தூய்மைப் பணியாளராகப் பணி புரிந்து வருகிறார். சம்பவத்தன்று, கோவை சாய்பாபா காலனி பகுதிக்கு உட்பட்ட மாநகராட்சி 69-வது வார்டில், சக்திவேல் மற்றும் அவரது சக ஊழியரான மணிகண்டன் ஆகிய இருவரும் வழக்கம்போல வீடு, வீடாகச் சென்று குப்பைகளைச் சேகரித்து, அதனைத் தரம் பிரிக்கும் ‘கள ஆய்வு’ பணியில் தீவிரமாக ஈடுபட்டு உள்ளனர்.

​அந்த அப்பகுதியைச் சேர்ந்த மூதாட்டி ஒருவர் தனது வீட்டில் இருந்த குப்பைகளை ஒரு பையில் போட்டு எடுத்து வந்து தூய்மைப் பணியாளர் சக்திவேலிடம் வழங்கி உள்ளார்.

 அந்தப் பையைப் பெற்றுக் கொண்ட சக்திவேல், மக்கும் குப்பை, மக்காத குப்பை எனப் பிரிப்பதற்காகப் பையைத் திறந்து ‘எக்ஸ்ரே’ ஆய்வு செய்து உள்ளார். அப்போது, குப்பைக்குள் இருந்த ஒரு சிறிய பைக்குள் பளபளப்பான தங்கச் சங்கிலி ஒன்று கிடப்பதைக் கண்டு அதிர்ச்சி அடைந்து உள்ளார். சற்றும் யோசிக்காத அவர், உடனடியாகத் தூரத்தே சென்று கொண்டு இருந்த அந்த மூதாட்டியை சத்தம் போட்டுத் திரும்ப அழைத்து, குப்பையோடு குப்பையாக வந்த தங்கச் சங்கிலியைக் காண்பித்து அவரிடமே பத்திரமாக ஒப்படைத்தார்.

​ஒரு சுப காரியத்திற்காகப் பல மாதங்கள் சிறுகச், சிறுகச் சேமித்து, வீட்டில் வாங்கி வைத்து இருந்த மூன்றரை சவரன் மதிப்பு உள்ள தங்கச் சங்கிலி அது என்பது தெரியவந்ததும், அதைத் திரும்பப் பெற்றுக் கொண்ட மூதாட்டியின் குடும்பத்தினர் தூய்மைப் பணியாளரின் அசல் நேர்மையைக் கண்டு கண்ணீர் மல்க  நன்றி தெரிவித்தனர். 

இந்த விபரம் அறிந்து நெகிழ்ந்து போன ‘ஸ்ரீனிவாசா வேஸ்ட் மேனேஜ்மென்ட்’ நிறுவனத்தின் உயர் அதிகாரி வெங்கடேஷ், நேர்மையின் சிகரமாக விளங்கிய ஒப்பந்தப் பணியாளர் சக்திவேலுக்குப் பொன்னாடை அணிவித்து, நெற்றிப் பொட்டில் திலகமிட்டு, ரொக்கப் பரிசு (Cash Prize) வழங்கித் தனது நிறுவனத்தின் சார்பாகக் கெளரவித்தார்.

​இதன் தொடர்ச்சியாக, இந்தச் செய்தி கொங்கு நாட்டு வி.ஐ.பி வட்டாரத்தில் பரவவே, கோவை மாநகராட்சி ஆணையர் சிவகுரு பிரபாகரன் ஐ.ஏ.எஸ் அவர்கள், பணியாளர் சக்திவேலைத் தனது நேர்முக அலுவலகத்திற்கு நேரடியாக அழைத்து, பொன்னாடை போர்த்தி, சிறப்புப் பரிசுகளை வழங்கித் தனது மனமார்ந்த பாராட்டுகளைத் தெரிவித்தார். 

இந்த நெகிழ்ச்சியான பாராட்டு விழா குறித்துப் பேசிய தூய்மைப் பணியாளர் சக்திவேல்,

 "நான் செய்யும் கடின உழைப்பிற்கு என் நிறுவனம் எனக்கு முறையான ஊதியம் வழங்கி வருகிறது. அப்படி இருக்கும் போது, அடுத்தவர் உழைப்பில் வந்த பொருளுக்கோ அல்லது நகைகளுக்கோ நாம் எப்போதுமே ஆசைப்படக் கூடாது என்ற கொள்கையில் வளர்ந்தவன் நான்; கார்ப்பரேஷன் அதிகாரிகள் மற்றும் எனது நிறுவனம் என்னை அழைத்து இவ்வளவு பெரிய மரியாதை செய்தது என் வாழ்நாளில் எனக்குக் கிடைத்த மாபெரும் மனநிறைவு" என உருக்கமாகத் தெரிவித்தார்.

 வறுமையிலும் கோவை மாநகராட்சிக்கும் பெருமை சேர்த்து உள்ள தூய்மைப் பணியாளர் சக்திவேலின் இந்தச் செயல் சமூக வலைத்தளங்களில் ‘ரியல் ஹீரோ’ என்ற பெயருடன் அனல் பறந்து வைரலாகி வருகிறது.