மாநில எல்லை கடந்து கோவை மத்திய நுண்ணறிவுப் பிரிவு நள்ளிரவில் அதிரடி... கேரளாவில் 200 கேன்களில் கடத்தப்பட்ட 7,000 லிட்டர் எரிசாராயம் பறிமுதல் !!!

 மாநில எல்லை கடந்து கோவை மத்திய நுண்ணறிவுப் பிரிவு நள்ளிரவில் அதிரடி... கேரளாவில் 200 கேன்களில் கடத்தப்பட்ட 7,000 லிட்டர் எரிசாராயம் பறிமுதல் !!!

மாநிலம் விட்டு மாநிலம் கடந்து கோவை மத்திய நுண்ணறிவுப் பிரிவு (Central Intelligence Unit) காவல் துறையினர் நள்ளிரவில் நடத்திய அதிரடி சோதனையில், சுமார் 7,000 லிட்டர் கடத்தல் எரிசாராயம் (Spirit) அடங்கிய 200 கேன்கள், கடத்தலுக்குப் பயன்படுத்தப்பட்ட கண்டெய்னர் லாரி மற்றும் முக்கியக் குற்றவாளி ஒருவனைப் பிடித்து அதிரடி நடவடிக்கை மேற்கொண்டு உள்ளனர். 

ரகசியத் தகவல் - மாநில எல்லை கடந்து பாய்ந்த கோவை சி.ஐ.டி:

கர்நாடக மாநிலத்தில் இருந்து கேரளா வழியே சட்டவிரோதமாகப் பெருமளவில் எரிசாராயம் (Spirit) கடத்தப்படுவதாகக் கோவை மத்திய நுண்ணறிவுப் பிரிவு காவல் துறையினருக்கு  ரகசியத் தகவல் கிடைத்தது.

அதன் பேரில், காவல் ஆய்வாளர் காமராஜ் தலைமையில், உதவி ஆய்வாளர் சேகர், தலைமைக் காவலர் மதிவாணன் மற்றும் கோவை மத்திய நுண்ணறிவுப் பிரிவு அடங்கிய தனிப்படையினர் களமிறங்கினர். உடனடி நடவடிக்கையாகக் கேரளா மாநிலம் கண்ணூர் எக்சைஸ் துறை (Excise Department) அதிகாரிகளுக்குத் தகவல் தெரிவிக்கப்பட்டு, இரு மாநில அதிகாரிகளும் இணைந்து நள்ளிரவில் ஆபரேஷனில் ஈடுபட்டனர்.

200 கேன்களில் 7,000 லிட்டர் எரிசாராயம் - லாரியுடன் பறிமுதல்:

கோவை மத்திய நுண்ணறிவுப் பிரிவினரும் கண்ணூர் எக்சைஸ் துறையினரும் இணைந்த கூட்டுத் தனிப்படையினர் நள்ளிரவில் நடத்திய அதிரடி சோதனையில், கர்நாடக மாநிலம் ஹூப்ளியில் இருந்து கேரள மாநிலம் கண்ணூர் பகுதிக்குக் கடத்தி வரப்பட்ட லாரியை மடக்கிப் பிடித்தனர்.

லாரியைச் சோதனையிட்ட போது, அதில் 200 பெரிய கேன்களில் அடைத்து ரகசியமாகக் கடத்தி வரப்பட்ட சுமார் 7,000 லிட்டர் அபாயகரமான எரிசாராயம் (Spirit) இருப்பது கண்டுபிடிக்கப்பட்டது. உடனடியாக 7,000 லிட்டர் எரிசாராயம், கடத்தலுக்குப் பயன்படுத்தப்பட்ட லாரி மற்றும் கடத்தலில் ஈடுபட்ட முக்கியக் குற்றவாளியைக் காவல் துறையினர் கையும் களவுமாகக் கைது செய்து பறிமுதல் செய்தனர்.

கேரள எக்சைஸ் துறையிடம் ஒப்படைப்பு – பெரும் பரபரப்பு:

கைது செய்யப்பட்ட குற்றவாளி, பறிமுதல் செய்யப்பட்ட லாரி மற்றும் 7,000 லிட்டர் எரிசாராயம் ஆகியவை அடுத்த கட்ட சட்டப்பூர்வ நடவடிக்கைகளுக்காகக் கேரள மாநில எக்சைஸ் துறையினரிடம் பாதுகாப்பாக ஒப்படைக்கப்பட்டன.

மாநிலங்களுக்கு இடையேயான பிரம்மாண்ட எரிசாராயக் கடத்தலைத் தமிழகத்தின் கோவை சி.ஐ.டி (CIU) போலீஸார் எல்லை தாண்டிச் சென்று துணிச்சலாகத் தடுத்து நிறுத்திய இந்த சம்பவம் இரு மாநில காவல் துறை வட்டாரத்திலும் பெரும் பரபரப்பையும் பாராட்டையும் பெற்று உள்ளது.