கோவையில் தொடரும் கொடூரம் : 10 நாட்களில் 4-வது கொலையால் மக்கள் பீதி !!!

 கோவையில் தொடரும் கொடூரம் : 10 நாட்களில் 4-வது கொலையால் மக்கள் பீதி !!!

வீட்டில் தனியாக இருந்த பெண் கட்டையால் அடித்துக் கொலை : குற்றவாளிகளைப் பிடிக்க 3 தனிப்படைகள் அமைத்து போலீஸ் தீவிர தேடுதல் !!!

 கோவை, பாப்பநாயக்கன்பாளையம் பகுதியில் வீட்டில் தனியாக இருந்த சாந்தி (58) என்ற பெண் கட்டையால் அடித்துக் கொலை செய்யப்பட்ட சம்பவம் பெரும் அதிர்ச்சியை ஏற்படுத்தி உள்ளது. கடந்த 10 நாட்களில் கோவையில் நடைபெறும் 4-வது கொலைச் சம்பவம் இது என்பதால் பொதுமக்கள் கடும் பீதியில் ஆழ்ந்து உள்ளனர்.

கோவை, பாப்பநாயக்கன்பாளையம், கருப்புக்கால் தோட்டத்தைச் சேர்ந்தவர் சாந்தி (58). வீட்டுச் சமையல் வேலை செய்து வந்த இவரது சொந்த ஊர் கேரளா மாநிலம் ஆகும். இவர் தனது மகன் ராஜா என்பவருடன் வசித்து வந்தார். ராஜா வெல்டிங் தொழிலாளியாக வேலை பார்த்து வருகிறார்.

நேற்று முன்தினம் வழக்கம் போல ராஜா வேலைக்குச் சென்று விட, சாந்தி வீட்டில் தனியாக இருந்து உள்ளார். இரவு வேலை முடிந்து ராஜா வீட்டிற்குத் திரும்பிய போது, தாய் சாந்தி தலையில் படுகாயங்களுடன் ரத்த வெள்ளத்தில் பிணமாகக் கிடப்பதைக் கண்டு அதிர்ச்சியில் உறைந்தார்.

கட்டையால் அடித்துக் கொலை - 3 தனிப்படைகள் அமைப்பு:

தகவல் அறிந்து சம்பவ இடத்திற்கு விரைந்து வந்த ரேஸ்கோர்ஸ் போலீஸார், சாந்தியின் உடலைக் கைப்பற்றிப் பிரேதப் பரிசோதனைக்காகக் கோவை அரசு மருத்துவமனைக்கு அனுப்பி வைத்தனர்.

முதற்கட்ட விசாரணையில், மர்ம நபர்கள் வீட்டிற்குள் புகுந்து சாந்தியைக் கட்டையால் தலையில் சரமாரியாக அடித்துக் கொலை செய்தது தெரியவந்தது.

 இக்கொலையைச் செய்த மர்ம நபர்களைப் பிடிக்கக் மாநகரக் காவல் ஆணையரின் உத்தரவின் பேரில் 3 தனிப்படைகள் அமைக்கப்பட்டுத் தீவிரத் தேடுதல் வேட்டை நடைபெற்று வருகிறது. சாந்தியின் சொந்த ஊரான கேரளாவிலும் போலீஸார் விசாரணை நடத்தி வருகின்றனர்.

10 நாட்களில் 4 கொலையால் கோவை மக்கள் பீதி:

கோவையில் சமீப நாட்களாகத் தொடர் கொலைச் சம்பவங்கள் அரங்கேறி வருவது சட்டம்-ஒழுங்கு குறித்த அச்சத்தை ஏற்படுத்தி உள்ளது. கடந்த 10 நாட்களில் மட்டும் கோவையில் 4 பேர் கொடூரமாகக் கொலை செய்யப்பட்டு உள்ளனர்:

ஆகஸ்ட் 3: நவீன் கொலை

ஆகஸ்ட் 6: அஸ்வின் கொலை

ஆகஸ்ட் 10: அமுதன் கொலை

ஆகஸ்ட் 13: சாந்தி (தற்போது) அடித்துக் கொலை

அடுத்தடுத்து அரங்கேறும் இந்தத் தொடர் கொலைச் சம்பவங்களால் கோவை மாநகர மக்கள் மிகுந்த அச்சத்தில் ஆழ்ந்து உள்ளனர்.

 போலீஸார் ரோந்துப் பணியைத் தீவிரப்படுத்தி, குற்றவாளிகளை உடனடியாகக் கைது செய்ய வேண்டும் எனப் பொதுமக்கள் கோரிக்கை விடுத்து உள்ளனர்.